“လေထဲ တိုက်အိမ်ဆောက်မဲ့ ကိစ္စတွေ မပြော” ဟု ပြည်ခိုင်ဖြိုး ပါတီဆို

ပည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီက နိုင်ငံဦးဆောင်မှုအခန်းကဏ္ဍကို နောက်တကြိမ် ပြန်လည် ရရှိပါက မိုးပေါ်ကကျလာမည့် အကူအညီများကို မျှော်မနေဘဲ အမျိုးသားအကျိုးစီးပွားတိုးတက်အောင် ဆောင်ရွက်သွားမည်ဟု ပါတီဗဟိုအလုပ်အမှုဆောင် ဦးဝဏ္ဍမောင်လွင်က ဆိုသည်။

“မိုးပေါ်က ကျလာတဲ့အကူအညီတွေကို စောင့်မျှော်ရင်း နက်ဖန်သဘက်ခါပဲ ဟိုနိုင်ငံကို ကျော်မယ်၊ ဒီနိုင်ငံ ကို ကျော်ရမယ်ဆိုပြီး လေထဲ တိုက်အိမ်ဆောက်မဲ့ကိစ္စတွေ ကျနော်တို့မပြောဘူး။ ” ဟု အမရပူရမြို့နယ် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီရုံးတွင် ယနေ့ပြုလုပ်သည့် ရပ်ကွက်၊ ကျေးရွာ အုပ်စု ပါတီဥက္ကဋ္ဌများ တာဝန်ပေးအပ်ပွဲနှင့် ပါတီဝင်အဆိုပြုလွှာပေးအပ်ပွဲတွင် ဦးဝဏ္ဍမောင်လွင်က ထိုသို့ ပြောကြားခဲ့ခြင်းဖြစ်သည်။

အကယ်၍ ပြည်ခိုင်ဖြိုးပါတီသာ နိုင်ငံဦးဆောင်မှု အခန်းကဏ္ဍကို ပြန်လည်ရရှိလာတဲ့အချိန်ကျ အမျိုးသား အကျိုး စီးပွား တိုးတက်ရေး၊ ပြည်သူများ၏ နေ့စဉ်လူမှုဘဝတိုးတက်ရေးနှင့် နိုင်ငံ အချုပ်အခြာ အာဏာ တည်တံ့ရေး မူဝါဒ တို့ကို ဦးစားပေးဆောင်ရွက်သွားမည် ဟု ဆိုသည်။

လာမည့်နိုဝင်ဘာတွင် ကျင်းပမည့် ကြားဖြတ်ရွေးကောက်ပွဲတွင် ပြည်ခိုင်ဖြိုးပါတီက မန္တလေးတိုင်းရှိ မဲဆန္ဒနယ် ၃ ခုအပါအဝင် လစ်လပ်မဲဆန္ဒနယ်ပေါင်း ၁၀ ခုတွင် ဝင်ရောက်ယှဉ်ပြိုင်မည်ဖြစ်ကြောင်း ပြည်ခိုင်ဖြိုး ပါတီက ၎င်းတို့၏ လူမှုကွန်ရက်စာမျက်နှာတွင် ယမန်နေ့ကထုတ်ပြန်ခဲ့သည်။

“ကျနော်တို့ပါတီအနေနဲ့ ရွေးကောက်ပွဲကော်မရှင်ရဲ့ သမာသမတ်ကျမှုကို လာမယ့် ကြားဖြတ်ရွေးကောက်ပွဲ ဝင်ရင်းနဲ့ စောင့်ကြည့်အကဲခတ်သွားမှာဖြစ်ပါတယ်” ဟု ပါတီ၏ ပြောရေးဆိုခွင့်ရှိသူ ဦးသိန်းထွန်းဦးက ဧရာဝတီကို ပြောသည်။

ပြည်ခိုင်ဖြိုးပါတီမှ ဝင်ရောက်ယှဉ်ပြိုင်မည့် ကိုယ်စားလှယ်လောင်းများမှာ ကချင်ပြည်နယ် အမျိုးသား လွှတ်တော်အ မှတ် ၂ မဲဆန္ဒနယ်အတွက် ဦးဆီဟူးဒွေ့၊ ချင်းပြည်နယ် ကန်ပက်လက် ပြည်သူ့လွှတ်တော် နေရာအတွက် ဦးမနားနိုင်း၊ စစ်ကိုင်းတိုင်း တမူးမြို့နယ် တိုင်းလွှတ်တော် ၂ အတွက် ဦးရိုထန်းပွီးယား၊ ပဲခူးတိုင်း(အရှေ့) တိုင်းလွှတ်တော် အုတ်တွင်း ၁ အတွက် ဦးဝင်းမြင့်၊ မကွေးတိုင်းလွှတ်တော် မင်းဘူး ၂ နေရာအတွက် ဦးစိန်ရွှေမင်း၊ မန္တလေးတိုင်း မြင်းခြံပြည်သူ့လွှတ်တော် အတွက် ဒေါက်တာသန်းဝင်း၊ မန္တလေးတိုင်း သပိတ်ကျင်း(၁) တိုင်းလွှတ်တော် အတွက် ဦးမြင့်စိုး၊ မန္တလေးတိုင်း ရှမ်းတိုင်းရင်းသားကိုယ်စားလှယ်အတွက် ဦးစိုင်းအောင်ကြည်၊ ရန်ကုန်တိုင်း တာမွေ ပြည်သူ့ လွှတ်တော် ကိုယ်စားလှယ်နေရာအတွက် ဦးမျိုးဝင်းကျော်၊ ရန်ကုန်တိုင်းလွှတ်တော် ဆိပ်ကမ်း(၂) နေရာအတွက် ဦးနေမျိုးအောင်တို့ ဖြစ်သည်။

ထို့အတွက် သက်ဆိုင်ရာမဲဆန္ဒနယ်မြေများတွင် မဲဆွယ်စည်းရုံးမှုများလည်း စတင်ဆောင်ရွက်နေရာ လာမည့် ကြားဖြတ် ရွေးကောက်ပွဲတွင် ပါတီလှုပ်ရှားမှု ပိုမိုကျစ်လစ်ခိုင်မာအောင် ဆောင်ရွက်နိုင်ရန် ပြီးခဲ့သည့်ရွေးကောက်ပွဲက ထားရှိခဲ့သော ရပ်ကွက်ကျေးရွာအဆင့် ပါတီစည်းရုံးရေးမှူး များအား ဥက္ကဋ္ဌအဖြစ် ခန့်အပ်တာဝန်ပေးခြင်းဖြစ်ကြောင်း သိရသည်။

၂၀၁၆ ခုနှစ် သြဂုတ်လမှ စ၍ ပါတီအတွင်း ခေါင်းဆောင်မှုအပါအဝင် လိုအပ်သည့်ပြန်လည် တည်ဆောက်မှုများ ပြုလုပ်ခဲ့ပြီး ရပ်ကွက်၊ ကျေးရွာအဆင့် ပါတီဥက္ကဋ္ဌများသည် ပါတီ၏ မူဝါဒများ ချမှတ်ဆောင်ရွက်ရာတွင် အခြေခံကျသည့် အုတ်မြစ်များဖြစ်သည့်အတွက် ယခုလို တာဝန်ပေးအပ်ခြင်း ဖြစ်သည်ဟု ဦးဝဏ္ဍမောင်လွင်က ဆိုသည်။

ယနေ့အခမ်းအနားတွင် ပြည်ခိုင်ဖြိုးပါတီမှ တာဝန်ရှိသူများ အပါအဝင် လူပေါင်း ၂၀၀ ကျော်ခန့် တက်ရောက်ခဲ့ပြီး ပါတီဝင်အဆိုပြုလွှာ ၅၀၀ ကျော်ခန့် လက်ခံရရှိကြောင်း ပါတီ၏ ပြောရေးဆိုခွင့်ရှိသူ ဦးသိန်းထွန်းဦးက ဧရာဝတီကို ပြောသည်။

လက်ရှိ ပြည်ခိုင်ဖြိုးပါတီ၏ ပါတီဝင်အင်အား အရေအတွက်မှာ စာရင်းတည်ငြိမ်မှုမရှိသေးသည့်အတွက် ထုတ်ပြန်ခြင်း မရှိသေးသော်လည်း ပါတီဥက္ကဋ္ဌ ဦးသန်းဌေးလက်ထက်တွင် ပါတီဝင်အသစ်များ သောင်း ဂဏန်းအထိ တိုးလာသည်ဟု ၎င်းက ဆိုသည်။

credit:Irrawaddy burmese

Share သွားပေးပါမိတ်ဆွေ

Add a Comment

Your email address will not be published. Required fields are marked *