ဖွဲ့စည်းပုံအခြေခံ ဥပဒေအရ တပ်မတော်နှင့် သက်ဆိုင်သည့် အဂတိ လိုက်စားမှုကိစ္စများကို အစိုးရဖွဲ့စည်းထားသည့် ကော်မရှင်မှ ကိုင်တွယ် ဆောင်ရွက်၍မရကြောင်း ပြောကြား

၂၀၀၈ ဖွဲ့စည်းပုံအခြေခံ ဥပဒေ၏ ပြဌန်းချက်များ အရ တပ်မတော်နှင့် သက်ဆိုင်သည့် အဂတိလိုက် စာမှုဆိုင်ရာ ကိစ္စရပ်များကို အစိုးရမှ ဖွဲ့စည်းထားသည့် အဂတိလိုက်စားမှု တိုက်ဖျက်ရေးကော်မရှင်မှ ကိုင်တွယ် ဆောင်ရွက်၍ မရကြောင်း ကော်မရှင် ဥက္ကဋ္ဌ ဖြစ်သူ ဦးအောင်ကြည်က ပြောကြားသည်။

ဒီဇင်ဘာလ ၇ ရက်နေ့တွင် ရန်ကုန်မြို့ရှိ Rose Garden Hotel ၌ ပြုလုပ်သော အဂတိလိုက်စားမှု တိုက်ဖျက်ရေး ကော်မရှင်၏ သတင်းစာ ရှင်းလင်းပွဲတွင် ကော်မရှင်ဥက္ကဋ္ဌက သတင်းမီဒီယာ များ၏ မေးမြန်းချက်များကို ပြန်လည်ဖြေကြားရာတွင် ထည့်သွင်း ပြောကြာခဲ့ခြင်း ဖြစ်သည်။

တပ်မတော်နှင့် ပတ်သက်ပြီး ယခုအချိန်ထိ ကော်မရှင်မှ အရေးယူ ဆောင်ရွက်မှု ပြုလုပ်ခြင်းမရှိသလို တပ်မတော်နှင့် ပတ်သက်ပြီး တိုင်ကြားမှုများလည်း မရှိကြောင်း ၄င်းက ပြောကြားသည်။

`တပ်မတော်နဲ့ ပတ်သက်ပြီးတော့ အခုအချိန်အထိ အန်ကယ်တို့ ကော်မရှင်က အရေးယူ ဆောင်ရွက်မှုမပြုပါဘူး။ တိုင်ကြားမှုလည်း မရှိပါဘူး။ တပ်မတော်နဲ့ ပတ်သက်ပြီးတော့။ အန်ကယ်တို့ ကော်မရှင်က ဒီဥပဒေအရပဲ ဆောင်ရွက်ရတာ ဖြစ်ပါတယ်။ ဥပဒေဆိုတဲ့ဥစ္စာ ဖွဲ့စည်းပုံအခြေခံဥပဒေကို အကြုံးမ၀င်ပါဘူး။ ဖွဲ့စည်းပုံ အခြေခံဥပဒေအရ တပ်မတော်ရဲ့ စီမံခန့်ခွဲမှုဟာ တပ်မတော်ကသာလျှင် ဆောင်ရွက်ရတာ ဖြစ်တဲ့အတွက်။ ဒီလိုအဂတိ လိုက်စားမှုကိစ္စတွေဟာ သူရဲ့ စီမံခန့်ခွဲမှု အောက်မှာပဲ။ သူဘာသာသူ အရေးယူဆောင်ရွက်မှုတွေ ရှိနေပါတယ်` ဟု ဦးအောင်ကြည်က ပြောကြားသည်။

၂၀၀၈ ဖွဲ့စည်းပုံအခြေခံဥပဒေ အခန်း (၇)၊ ပုဒ်မ ၃၄၃။ စစ်ဘက် တရားစီရင်ရာတွင်- (က) တပ်မတော်သားများအတွက် အဖွဲ့ဖြင့်ဖြစ်စေ၊ တစ်ဦးတည်းဖြစ်စေ ဥပဒေနှင့်အညီ စီရင်နိုင်သည်၊ (ခ) တပ်မတော် ကာကွယ်ရေးဦးစီးချုပ်၏ အဆုံးအဖြတ်သည် အပြီးအပြတ်ဖြစ်သည်ဟု တပ်မတော်နှင့် ပတ်သက်ပြီး ပြဌာန်းထားသည်။

အဂတိလိုက်စားမှု တိုက်ဖျက်ရေးကော်မရှင်ကို နိုင်ငံတော်သမ္မတ ဦးထင်ကျော်လက်ထက် နိုဝင်ဘာလ ၂၃ ရက်တွင် ပြန်ကြားရေး ၀န်ကြီး ဟောင်း ဦးအောင်ကြည်ကို ဥက္ကဋ္ဌအဖြစ်ခန့်အပ်ကာ အဖွဲ့ဝင် ၁၁ ဦးဖြင့် ဖွဲ့စည်းခဲ့သည်။

Credit:The Ladies News

နှစ်သက်ရင် Share သွားနိုင်ပါတယ်။

Leave a Reply

Your email address will not be published. Required fields are marked *