Local News

မြန်မာနိုင်ငံကို နိုင်ငံတကာပြစ်မှုဆိုင်ရာ တရားရုံးသို့ ရောက်ရှိစေရန် လုပ်ဆောင်သည့် မည်သည့် တောင်းဆိုမှုမျိုးကိုမဆို ပယ်ချကြောင်း မြန်မာအမြဲတမ်း ကိုယ်စားလှယ် ဦးကျော်မိုးထွန်းတုံ့ပြန်

မြန်မာနိုင်ငံကို နိုင်ငံတကာပြစ်မှုဆိုင်ရာ တရားရုံးသို့ ရောက်ရှိစေရန် လုပ်ဆောင်သည့် မည်သည့်တောင်းဆို မှုမျိုးကိုမဆို ပယ်ချကြောင်း လူ့အခွင့်အရေးကောင်စီ၏ အကြိမ် (၄၀) မြောက် ပုံမှန်အစည်းအဝေးအတွင်း မြန်မာနိုင်ငံ လူ့အခွင့်အရေး အခြေအနေဆိုင်ရာ အထူးအစီရင်ခံစာတင်သွင်းသူ၏ တင်ပြချက်အပေါ် မြန်မာအမြဲတမ်းကိုယ်စားလှယ် ဦးကျော်မိုးထွန်းက တုံ့ပြန်ပြောကြားသည်။

ဂျီနီဗာမြို့တွင် ကျင်းပနေသည့် လူ့အခွင့်အရေးကောင်စီ ပုံမှန်အစည်းအဝေးတွင် အထူးအစီရင်ခံစာတင်သွင်းသူ မစ္စယန်ဟီးလီနှင့် အပြန်အလှန်ဆွေးနွေးမှုကို မတ် ၁၁ ရက် တွင်ပြုလုပ်ခဲ့ပြီး အထူးအစီရင်ခံစာတင်သွင်းသူ၏ ဘက်လိုက်၍ အပြုသဘောမဆောင်သည့် မှတ်ချက်များနှင့်ပတ်သက်ပြီး ဦးကျော်မိုးထွန်းက အထက်ပါအတိုင်း တုံ့ပြန်ပြောကြားခဲ့ခြင်းဖြစ်ကြောင်း မတ် ၁၂ ရက်တွင် နိုင်ငံခြားရေးဝန်ကြီးဌာနက သတင်းထုတ်ပြန်သည်။

ရခိုင်ပြည်နယ်တွင် လူ့အခွင့်အရေး ချိုးဖောက်မှုများနှင့် ပတ်သက်၍ ခိုင်လုံသော သက်သေအထောက်အထား ပြသနိုင်ပါက တာဝန်ခံမှု၊ တာဝန်ယူမှုရှိစေရေး မြန်မာအစိုးရက အပြည့်အဝအာမခံကြောင်း၊ မြန်မာအစိုးရ ဖွဲ့စည်းခဲ့သည့် လွတ်လပ်သော စုံစမ်းစစ်ဆေးရေးကော်မရှင်သည် လူ့အခွင့်အရေးဆိုင်ရာ ချိုးဖောက်မှုများအားလုံးကို စုံစမ်းစစ်ဆေးနေကြောင်း ဦးကျော်မိုးထွန်းက ပြောကြားသည်။

မိမိဆန္ဒအလျောက် နေရပ်ပြန်လာလိုသည့် ဟိန္ဒူဘာသာဝင် ၄၄၄ ဦးအပါအဝင် ပြန်လည်စိစစ်ပြီးသော နေရပ်စွန့်ခွာသူများအား ပြန်လည်လက်ခံရေး လုပ်ငန်းစဉ်ကို စတင်ရန်အတွက် ပူးတွဲလုပ်ငန်းအဖွဲ့ အစည်းအဝေးကို ဧပြီတွင်စတင်ရန် ဘင်္ဂလားဒေ့ရ်ှဘက်သို့ အကြောင်းကြားထားကြောင်း၊ ကော့ဘဇားရှိ နေရပ်စွန့်ခွာသူများ ရခိုင်ဒေသသို့ ပြန်လာလိုကြောင်း မကြာခဏ ထုတ်ဖော်ပြောကြားမှုများရှိသည်ကို အထူးအစီရင်ခံစာ တင်သွင်းသူက သိရှိခြင်း ရှိ၊ မရှိ မေးမြန်းလို ကြောင်းလည်း ဦးကျော်မိုးထွန်းက တုံ့ပြန်ပြောကြားသည်။

၂၀၁၆ ခုနှစ်နှင့် ၂၀၁၇ ခုနှစ်တွင် ရဲကင်းစခန်းများကို အာဆာအကြမ်းဖက်အဖွဲ့က ကြိုတင်အကွက်ချ တိုက်ခိုက်ခဲ့မှုကြောင့် ထိခိုက်ခံစားခဲ့ရသည့် အသိုက်အဝန်းများနှင့်ထပ်တူ မြန်မာနိုင်ငံကလည်း စိုးရိမ်ပူပန်ကြောင်း၊ အာဆာအဖွဲ့၏ အကြမ်းဖက်မှုများအား ကြောက်ရွံ့ခြင်းကြောင့် လူအမြောက်အမြား နေရပ်စွန့်ခွာမှု ဖြစ်စေခဲ့ကြောင်းနှင့် အကြမ်းဖက်လှုံ့ဆော်မှုများကို အာဆာအဖွဲ့က ဆောင်ရွက်ခဲ့ခြင်းဖြစ်ကြောင်း ၎င်းက ပြောကြားသည်။

စိန်ခေါ်မှုများနှင့် အကန့်အသတ်များ ရင်ဆိုင်ကြုံတွေ့နေရသော်လည်း မြန်မာနိုင်ငံအနေဖြင့် ပြည်သူများ၏ အခွင့်အရေးများ ကာကွယ်မြှင့်တင်ရေးကို ဦးစားပေးလုပ်ငန်းတာဝန်အဖြစ် အစွမ်းကုန် ဆက်လက်ဆောင်ရွက်သွားမည်ဟု ၎င်းက ပြောကြားခဲ့ပြီး မြန်မာအစိုးရနှင့် ကုလသမဂ္ဂ လူ့အခွင့်အရေးဆိုင်ရာ အဖွဲ့အစည်းများ ပူးတွဲဆောင်ရွက်နေမှု အခြေအနေများကို ရှင်းလင်းပြောကြားခဲ့သည်။

လူ့အခွင့်အရေးနှင့် အားလုံးပါဝင်မှုသည် မြန်မာနိုင်ငံ၏ ဒီမိုကရေစီလူ့အဖွဲ့အစည်းသို့ အောင်မြင်စွာ အသွင်ကူးပြောင်းနိုင်ရေးအတွက် အဓိကကျကြောင်း၊ ရေရှည်တည်တံ့သော ငြိမ်းချမ်းရေး၊ စစ်မှန်သော အမျိုးသားပြန်လည်သင့်မြတ်ရေး၊ အားလုံးပါဝင်သော ဖွံ့ဖြိုးတိုးတက်ရေး၊ တရားဥပဒေစိုးမိုးမှုရှိရေးတို့အတွက် အစိုးရက ကြိုးပမ်းဆောင်ရွက်နေသည်ဟုလည်း ဦးကျော်မိုးထွန်းက ဆိုသည်။

မြန်မာနိုင်ငံသည် လက်ရှိ အထူးအစီရင်ခံစာတင်သွင်းသူနှင့် ဆက်လက်ပူးပေါင်းဆောင်ရွက်ရန် မဖြစ်နိုင်ကြောင်း၊ အထူးအစီ ရင်ခံစာတင်သွင်းသူ အသစ်ခန့်အပ်ပေးရန် မေတ္တာရပ်ခံကြောင်း၊ ယန်ဟီးလီနှင့် တတ်နိုင်သမျှ ပူးပေါင်းဆောင်ရွက်ခဲ့သော်လည်း ၎င်းသည် တာဝန်ထမ်းဆောင်ရာတွင် ကျင့်ဝတ်စည်းကမ်းဘောင်ကို ကျော်လွန်လုပ်ဆောင်ခြင်း၊ ဘက်လိုက်မှုရှိခြင်းတို့ကြောင့် ပြည်သူများ နှစ်သက်လိုလားမှုမရှိကြောင်း ဦးကျော်မိုးထွန်းက ဆိုသည်။

ထို့ပြင် ရခိုင်အရေးနှင့်ပတ်သက်၍ မကြာသေးမီက AA အကြမ်းဖက်အဖွဲ့က ရဲကင်းစခန်းများကို တိုက်ခိုက်ရာ မှ လက်နက်ကိုင်ပဋိပက္ခဖြစ်ပွားမှုကြောင့် အခြေအနေများကို ပိုမိုရှုပ်ထွေးစေခဲ့ကြောင်း လည်း မြန်မာအမြဲတမ်းကိုယ်စားလှယ် ဦး ကျော်မိုးထွန်းက ပြောကြားခဲ့သည်။

____ LKT

About the author

လက်ခတ်သံ