Crime

မန္တလေးမြို့မှာ နေအိမ်အတွင်း ဝင်ရောက် လုယက်မှု ဖြစ်ပွား

မန္တလေးမြို့ အောင်မြေသာစံမြို့နယ်၊ ဒေါနဘွား ရပ်ကွက်တွင် မေလ ၁၈ ရက်နေ့ နံနက်ပိုင်းအချိန်က နေအိမ်အတွင်း ဝင်ရောက် လုယက်မှုဖြစ်ပွားခဲ့ကြောင်း သိရသည် ။

ဖြစ်စဉ်မှာ ဒေါ်ခင်သန်းမြင့် သည် နေအိမ်အိပ်ခန်းအတွင်း၌ ကုတင်ပေါ်တွင် မှောက်၍ ဖုန်းကြည့်နေစဉ် နေအိမ်အခန်း အတွင်းသို့ အမည်မသိအမျိုးသား (၁) ဦးဝင်ရောက်လာကာ ဒေါ်ခင်သန်းမြင့် အား သိုင်းဖက်ထားရှိကာ ပါးစပ်အားပိတ်၍ မအော် ရန်ပြောဆိုခဲ့သည် ။

ထို့နောက် ဒေါ်ခင်သန်းမြင့်ကို ကြောက်ရွံ့စေရန် အရှည် (၄) လက်မခန့်ရှိ ချွန်ထက်သော အရာဝတ္ထုအားပြ၍ ၄င်းမှငွေကိုလိုချင် ကြောင်းပြောဆိုကာ ကုတင်ဘေးရှိ စားပွဲခုံအံဆွဲများအား ဆွဲဖွင့်ရှာဖွေရာ ငွေများမတွေ့ရှိသည့်အတွက် ဒေါ်ခင်သန်းမြင့် အား ဘာရှိလဲဟု မေးမြန်းခဲ့ကြောင်း သိရသည် ။

ဒေါ်ခင်သန်းမြင့်အနေဖြင့်လည်း အသက်အန္တရာယ်တစ်စုံတရာပြုမည်စိုးရိမ်၍ နားကပ်ယူသွားဟုပြောရာ တန်ဘိုးငွေ (၁၇) သိန်းကျပ်တန် စိန်ခြယ် နားကျပ်(၁)ရံအား ချွတ်ပေး လိုက်သည် ။

ထို့အပြင် ဧည့်ခန်းကုလားထိုင်တွင်တင်ထားသော အမျိုးသမီးလက်ကိုင်အိတ်အတွင်းမှ ငွေကျပ်(၁၀)သိန်းနီးပါးအားခိုးယူသွားခဲ့ကြောင်း မှုခင်းမှတ်တမ်းအရသိရသည် ။

ယင်းဖြစ်စဉ်နှင့် ပတ်သက်၍ အမည်မသိ အမျိုးသားအား စုံစမ်းဖော်ထုတ်အရေးယူရန်အတွက် အမှတ်(၁)နယ်မြေရဲစခန်းတွင် (ပ)၂၆၇/၂၀၁၉၊ ရာဇသတ်ကြီးပုဒ်မ – ၃၈၂ ဖြင့်အမှုထားကြောင်း သိရသည်။

ref:The Fifth Wave News

About the author

လက်ခတ်သံ